Տարբեր քաղաքներու մէջ թուրք-քիւրտ բախումներ. քիւրտերը կը հեռանան անգարայէն

սեպտեմբեր 11, 2015 - 07:38        Viewed: 1342       

ԱԶԴԱԿ (Լիբանան) -Քրտական աշխատաւորական կուսակցութեան (ՔԱԿ) եւ թրքական զինեալ ուժերու միջեւ զինուորական գործողութիւնները, ինչպէս նաեւ իշխանութիւններուն կողմէ իրագործուող քարոզչութիւնը յանգեցուցած են Թուրքիոյ մէջ հակաքրտական շարժումի յառաջացման:

Թրքական «Վաթան» օրաթերթը հաղորդած է, որ Կորճայքի Տաղլըճա շրջանին մէջ 16 թուրք զինուորներու սպանութեան հարցով Այնթապի մէջ երեքշաբթի օր իշխանութիւններուն կողմէ հրահրուած հակաքրտական բողոքի գործողութիւնը վերածուած է քիւրտերու հետ բախումի:

Այնթապի մէջ թուրք ազգայնականներու ցոյցին զուգահեռ քաղաքի միւս մասին մէջ տեղի ունեցած է քիւրտերու հաւաք, որմէ ետք երկու հակադիր խմբաւորումները շարժած են իրարու դէմ: Ոստիկանութիւնը քիւրտերուն հաւաքը նկատելով անօրինական, փորձած է կասեցնել զայն: Տեղի ունեցած բախումին ժամանակ ոստիկան մը ոտքէն վիրաւորուած է` անյայտ անձի մը կողմէ արձակուած փամփուշտէ:

Հակառակ ատոր` անխուսափելի եղած է թուրք ազգայնականներու եւ ՔԱԿ¬ի համակիր քիւրտերու միջեւ բախումը, որուն ընթացքին մահակներով եւ այլ իրերով ծեծկռտուքի ժամանակ բազմաթիւ մարդիկ վիրաւորուած են: Ոստիկանները յաջողած են հակամարտ կողմերը ցրուել` անոնց դէմ օգտագործելով արցունքաբեր կազ եւ ջրաշիթ մեքենաներ:

Թուրքերու եւ քիւրտերու միջեւ մեծ զինեալ բախում տեղի ունեցած է նաեւ Անգարայի մէջ` քիւրտերով բնակուած Պէյփազարի Զաֆեր թաղամասին մէջ, ուր կրակոցներ լսուած են: Ընկերային ցանցերը հաղորդած են, որ այդ բախումներուն ընթացքին մեծ թիւով վիրաւորներ եղած են, սակայն այս մասին իշխանութիւնները ոչինչ կը հաղորդեն:

Երէկ Պէյփազարէն գիւղատնտեսական աշխատանքներով զբաղող մեծ թիւով քիւրտեր հեռացած են:

«Գորշ գայլեր»-ու խորհրդանիշերով հարիւրաւոր թուրքեր յարձակած են ՔԱԿ¬ի դէմ զինուորական գործողութիւններուն դէմ բողոքող քիւրտերու դէմ: Փոխադարձ յարձակումներու ընթացքին Պէյփազարի փողոցներուն մէջ կանգնած բազմաթիւ ինքնաշարժներ հրկիզուած են: Հակառակ ոստիկանութեան միջամտութիւններուն, բախումները շարունակուած են ամբողջ գիշեր:

Քրտամէտ Ժողովուրդներու ժողովրդավարական կուսակցութեան Պէյփազարի բաժանմունքի ղեկավար Ապտօ Էօներ լրագրողներուն յայտնած է, որ անվտանգութեան նկատառումներով քիւրտերը զանգուածաբար կը հեռանան Անգարայէն: «Անգարայի մէջ քիւրտերը իրենք զիրենք վտանգուած կը նկատեն եւ զանգուածաբար կը լքեն քաղաքը: Առաջինը հիմնականին մէջ կը հեռանան ամառնային եղանակի աշխատանքի համար շրջաններէն Անգարա եկած քիւրտերը, կը հեռանան նաեւ այստեղ 50 տարիէ ի վեր բնակած քիւրտերը: Անգարայէն արդէն շուրջ 600-700 ընտանիքներ հեռացած են», յայտնած է Էօներ` նշելով, որ անվտանգութեան նկատառումներով ինք իր ընտանիքը տեղափոխած է Փոլաթլու:

«Պի.Պի.Սի. Թուրք»-ի հետ զրոյցի ընթացքին քիւրտ աշխատաւոր Ռեճեփ Քայա յայտնած է, որ ընտանիքով կը մեկնի Մարտին: «Մենք կը լքենք Անգարան եւ այլեւս ետ պիտի չգանք, որովհետեւ այստեղ չեն ուզեր տեսնել քիւրտերը», ըսած է ան:

Թուրքիոյ իշխող Արդարութիւն եւ բարգաւաճում կուսակցութեան Պէյփազարի բաժանմունքի ղեկավար Մեհմեթ Եայըն ըսած է. «Քիւրտերուն մօտ խուճապային տրամադրութիւն կայ: Հեռանալ-չհեռանալու մասին մեզի կը հարցնեն նաեւ Արդարութիւն եւ բարգաւաճում կուսակցութեան անդամ քիւրտերը: Անգարայէն բոլոր քիւրտերուն հեռանալը անկարելի է: Այստեղ 50 տարիէ ի վեր բնակող քիւրտ ընտանիքներ կան: Անոնք տուներ գնած են, երեխաները այստեղ կ՛ուսանին»:

Միւս կողմէ, «Անատոլու» հաղորդեց, որ Թուրքիան անվտանգութեան նկատառումներով փակած է Իրանի հետ սահմանը:

Օրացույց