Ռուսաստանը կրկին առաջարկում է Հայաստանին պետական կարգավիճակ տալ ռուսաց լեզվին

հուլիս 20, 2017 - 08:33        Viewed: 180       

Ռուսաստանի Պետդումայի խոսնակ Վյաչեսլավ Վոլոդինը Հայաստանի իշխանություններին առաջարկել է երկրում օրենսդրորեն պաշտոնական կարգավիճակ տալ ռուսերեն լեզվին: Վոլոդինն ասել է, որ այդ դեպքում Ռուսաստանի տարածքում հնարավոր կլինի ճանաչել հայաստանյան վարորդական իրավունքները:

Հունիսի 1-ից Ռուսաստանում ուժի մեջ է մտել օտարերկրյա վարորդական իրավունք ունեցող վարորդներին Ռուսաստանի տարածքում աշխատելն արգելող օրենքը։ Հուլիսի 14-ին ընդունված օրենքում, սակայն, կա մի դրույթ, ըստ որի՝ Եվրասիական տնտեսական միության անդամ այն պետությունների քաղաքացիները, որտեղ ռուսերենը պետական լեզու է, ունեն թույլտվություն Ռուսաստանի տարածքում վարորդ աշխատել ազգային վարորդական իրավունքների հիման վրա։ Այսպիսով, Հայաստանի քաղաքացիները, չնայած ԵԱՏՄ անդամ-պետության բնակիչներ են, չեն կարող ՌԴ-ում իրենց երկրում ստացած վարորդական իրավունքներով աշխատանքի անցնել:

Վյաչեսլավ Վոլոդինի հայտարարությունն առաջացրել է փորձագիտական և հասարակական շրջանակների դժգոհությունը:

Քաղաքագետ Ստյոպա Սաֆարյանն օրինակ հիշեցրել է, որ դեռևս 2011թ.-ից ռուսական կողմը անթաքույց ու «անազնիվ» մեթոդներով փորձում է ռուսաց լեզուն Հայաստանում առաջ մղել:

Քաղաքագետի դիտարկմամբ, միայն այն հանգամանքը, որ Հայաստանում ռուսալեզու դպրոցները հավասար կարգավիճակի վրա են հայալեզու դպրոցների հետ, վկայում է այն մասին, որ Հայաստանի Հանրապետության իշխանությունները առարկություններ չունեն Ռուսաստանի քաղաքականության վերաբերյալ:

«Սա ակնհայտ ոտնձգություն է հայոց լեզվի և Հայաստանի ինքնիշխանության նկատմամբ, որովհետև Ռուսաստանն իրավունք չունի պարտադրել մեզ այս ամենը: Փաստացի մեր հայ միգրանտները, որոնք այսօր աշխատում են Ռուսաստանում, դիտարկվում են որպես պատանդներ Ռուսաստանի կողմից, և նրանց խնդիրներով փորձում են ազդել պաշտոնական Երևանի ու Հայաստանի հասարակության վրա», -շեշտել է Սաֆարյանը:

Իշխող «Հանրապետական» կուսակցության անունից, ՀՀԿ Գերագույն մարմնի անդամ, պատգամավոր Արմեն Աշոտյանը հավաստիացրել է, որ ռուսաց լեզվի սահմանադրական կարգավիճակի հարց Հայաստանի օրակարգում չկա և չի նախատեսվում:

Ինչ վերաբերում է Ռուսաստանում հայկական վարորդական իրավունքների վավերական լինելուն, Արմեն Աշոտյանը նշել է, որ երկու երկրների խորհրդարանական պատվիրակությունները պայմանավորվել են Ռուսաստանում հայկական վարորդական իրավունքների ճանաչման հետ կապված քննարկումները շարունակել խորհրդարանական այլ ձևաչափերով, մասնավորապես՝ խորհրդարանական լսումների միջոցով՝ խնդրի լուծման ամենաօպտիմալ տարբերակաները գտնելու համար:

Հարցի վերաբերյալ արտահայտվել են նաև Ֆեյսբուքում գրանցված հայ օգտատերերը: Ներկայացնում ենք նրանց գրառումներից մի քանիսը.

«Վարորդական իրավունքի ճանաչումը ոչ մի կապ չի կարող ունենալ ռուսերենին կարգավիճակ տալու հետ։ Դրանից վարորդների ունակությունները չեն ավելանում։ Կարելի է վարորդական իրավունքների թարգմանված տարբերակների մասին մտածել, ընդամենը… Վաղն էլ ուրիշ պատճառ կմոգոնեն, որ ռուսաց լեզվին կարգավիճակ տան»:

«Էս ի՞նչ պատասխան են տվել Հայաստանի իշխանությունները. լավ պատասխանը էն կլիներ, որ ասեին. Որևէ մեկը թող լկտիություն չունենա անգամ նման հարցադրում անելու…»

«Էնքան են լկտիացել, որ վարորդ աշխատելու հնարավորություն տալու համար իրանց թույլ են տալիս կպնեն ժողովրդի նուրբ լարերին»:

«Թող մեր քաղաքացիները, որոնք Ռուսաստանում մտադիր են վարորդ աշխատել, հանձնեն ռուսաց լեզվի քննություն, և իրենց լեզվական պահանջներին համապատասխանելու դեպքում՝ ստանան իրավունք աշխատելու: Իսկ Հայաստանում ռուսաց լեզվին կարգավիճակ տալու պահանջը, եթե ավելին չասեմ, տրամաբանությունից հաստատ դուրս է»:

Օրացույց