Հայոց լեզվի և գրականության դասագրքերը աշակերտների սեղանին են

հոկտեմբեր 06, 2017 - 00:04        Viewed: 180       

Վրաստանի հայալեզու դպրոցները 4 տարի ընդմիջումից հետո ստացան հայոց լեզվի և գրականության նոր դասագրքեր: Վրաստանի Կրթության և Գիտության նախարարության և Հայաստանի ԿԳ նախարարության բանակցությունների արդյունքում Վրաստանի հայալեզու դպրոցների աշակերտները այսուհետ կսովորեն նոր դասագրքերով: Նոր ուսումնական տարվա սկզբին Վրաստանի ԿԳ նախարարությունը Հայաստանից ստացել է առաջինից մինչև իններորդ դասարանների աշակերտների համար: Ընդհանուր առմամբ Հայաստանի Կրթության և Գիտության նախարարությունը 19 017 կտոր գիրք է ուղարկել:

Ինչպես տեղեկացանք Ախալքալաքի Կրթական ռեսուրս կենտրոնից, շրջանի 65 դպրոցներին անվճար բաժանվել է դպրոցական դասագրքեր, այդ թվում և նոր հայկական գրքեր: Ախալքալաքը ստացել է հայոց լեզվի և գրականության նոր 8 738 կտոր գիրք:

«Ուսումնական տարվա սկզբում ԿԳ նախարարությունից ստացանք նամակ, որ հայոց լեզվի և գրականության դասագրքեր են ստացել Հայաստանից: Հիմա արդեն դասագրքերը բաժանվել է աշակերտներին, բոլոր դպրոցներին անխտիր, ըստ անհրաժեշտ քանակի բաժանվել է: Տեղեկանում էինք դպրոցներից, որ գրքերը վատ վիճակում են և անհրաժեշտ են նոր դասագրքեր, հետևաբար այդ պրոբլեմային հարցը նույնպես լուծվեց», -ասաց Ախալքալաքի Կրթական ռեսուրս կենտրոնի ղեկավար Թերեզա Չիվչյանը:

2013 թվականից այս կողմ Վրաստանի հայալեզու դպրոցները հայոց լեզվի և գրականության դասագրքերով չէին համալրվել: Վերջին անգամ Վրաստանում գործող հայալեզու դպրոցները հայոց լեզվի և գրականության դասագրքեր ստացել էին 2015 թվականի դեկտեմբերին, որոնք, ինչպես ավելի ուշ պարզվեց, չէր համապատասխանում ուսումնական ծրագրին, այդ իսկ պատճառով էլ չբաժանվեց աշակերտներին: Այդ ժամանակ Հայաստանի Սփյուռքի նախարարությունը 5 265 դասագիրք էր ուղարկել Վրաստանի հայկական դպրոցների աշակերտներին:

Հավելենք, որ 2009-2013 թթ. Հայաստանի Հանրապետության Կրթության և Գիտության նախարարության կողմից Վրաստանի հայալեզու դպրոցներին տրամադրվել է 61 522 կտոր գրականություն: Համաձայն հետևյալ բախշման՝ 2009–2010 թթ. ուսումնական տարում 32 060 կտոր, 2011 թվականին՝ 7 138, 2012 թվականին՝ 7 569 և 2013 թվականին՝ 14 755 կտոր ուսումնական գրականություն:

Ախալքալաքի շրջանում կա 65 դպրոց, որից 55-ը հայալեզու է, 7-ը՝ վրացական, 1-ը՝ ռուսական և 2-ը խառը` հայ-վրացական ուսուցմամբ: Ըսթ պաշտոնական վիճակագրության այդ դպրոցներում աշակերտների ընդհանուր թիվը կազմում է 7176 աշակերտ:

Աղունիկ Այվազյան

Օրացույց