Ոչ ոք չի պատրաստվում կամուրջներն այրել

սեպտեմբեր 10, 2018 - 00:02        Viewed: 229       

Կրեմլում կայացել է Ռուսաստանի նախագահ Վլադիմիր Պուտինի և Հայաստանի վարչապետ Նիկոլ Փաշինյանի հանդիպումը: Ռուսաստանի առաջնորդն իր ողջույնի խոսքում հայտարարել է, որ երկու երկրների միջև հարաբերություններն առանձնահատուկ բնույթ են կրում դարեր շարունակ. «Այսօրվա դրությամբ Հայաստանի և Ռուսաստանի միջև հարաբերությունները կայուն զարգանում են բոլոր ուղղություններով: Դա վերաբերում է քաղաքական հարաբերությունների ոլորտին, ռազմական ոլորտին, անվտանգության հարցերին, տնտեսական համագործակցությանը»:

Փաշինյանն, իր հերթին, հաստատել է, որ կողմերը պատրաստվում են քննարկել հարցերի լայն շրջանակ, որոնք վերջին ժամանակներս կուտակվել են Երևանի և Մոսկվայի հարաբերություններում: «Աստված հեռու պահի այդպիսի իրավիճակից, երբ հարաբերություններում չկան հարցեր, քանի որ դա կնշանակեր, որ հարաբերություն ընդհանրապես գոյություն չունի: Վստահորեն կարող եմ ասել, որ մեր հարաբերությունններում չկան անլուծելի հարցեր, և մենք այսօր կքննարկենք հարցերի շատ լայն շրջանակ: Վստահ եմ, որ այդ հարցերը կլուծվեն` մեր դաշնակցային հարաբերությունների շահերի նկատմամբ հարգանքի, մեր երկրների շահերի նկատմամբ հարգանքի, մեր երկրների սուվերենության նկատմամբ հարգանքի և միմյանց ներքին գործերին չմիջամտելու սկզբունքի հիման վրա:

Մենք շահագրգռված ենք մեր հարաբերությունների հետագա զարգացմամբ և սերտացմամբ. նկատի ունեմ ոչ միայն երկկողմ հարաբերությունները, այլև համագործակցությունը և՛ Եվրասիական տնտեսական միության, և՛ Հավաքական անվտանգության պայմանագրի կազմակերպության շրջանակում, և՛ ընդհանրապես մյուս ոլորտներում»:

Հայաստանի վարչապետը հայտարարել է նաև, որ, չնայած խնդիրների առկայությանը, երկրների միջև հարաբերությունները դինամիկ են զարգանում. «Ի հեճուկս որոշակի հոռետեսության, որ այսօր գոյություն ունի և հայաստանյան, և ռուսաստանյան լրատվական տիրույթում և սոցիալական ցանցերում, կարծում եմ, որ մեր հարաբերությունները զարգանում են շատ դինամիկ, շատ բնական»:

Սա հայկական հեղափոխությունից հետո Հայաստանի և Ռուսաստանի առաջնորդների արդեն երրորդ հանդիպումն է: Ռուսական լրատվամիջոցներն ավելի վաղ հաղորդում էին, որ Կրեմլը մտադիր է Փաշինյանի հետ քննարկել Հայաստանի նախկին ղեկավարներին հետապնդելու թեման, մասնավորապես, քրեական գործերը նախկին նախագահ Ռոբերտ Քոչարյանի և պաշտպանության նախարար Միքայել Հարությունյանի դեմ:

Նշվում էր նաև, որ Մոսկվան դժգոհ է ՀԱՊԿ գլխավոր քարտուղար Յուրի Խաչատուրովի շուրջ ստեղծված իրավիճակից: Նա, ինչպես և Քոչարյանն ու Հարությունյանը, «Մարտի 1-ի» աղմկահարույց գործերի ֆիգուրանտ է և կասկածվում է իշխանության բռնազավթման համար: ՀԱՊԿ մյուս անդամները կարծում են, որ միջադեպը լուրջ վնաս է հասցրել կազմակերպության կարգավիճակին:

Օրակարգի թեմաներից մեկն էլ Հայաստանի կողմից ռուսական զենքի գնման հարցն էր: Յուրի Խաչատուրովի պատմությունից հետո տեղեկատվություն տարածվեց, որ Ռուսաստանը կարող է հրաժարվել զենք մատակարարելու 100 մլն դոլար արժողությամբ վարկային համաձայնագրի կատարումից: Ավելի վաղ Ռռուսաստանի պաշտպանության փոխնախարար Ալեքսանդր Ֆոմինը հայտարարել էր, որ «դա ոչ կոռեկտ տեղեկություն է»:

Քաղաքագետ Ալեքսանդր Իսկանդարյանը կարծում է, որ այս հանդիպումը Մոսկվայի և Երևանի միջև տարաձայնությունները լուծելու հնարավորություն է. «Հետխորհրդային երկրների փոխազդեցության քաղաքականությունը վարվում է ոչ թե դեսպանների և նույնիսկ ԱԳՆ ղեկավարների, այլ առաջին դեմքերի մակարդակում: Վստահելի կապ հաստատելու համար դեռ էլի այցեր կպահանջվեն: Չեմ կարծում, որ հայ-ռուսական հարաբերություններում ամեն ինչ հիանալի կլինի: Սակայն զենքը, կարծես, կշարունակեն մատակարարել: Իսկ դա ցույց է տալիս, որ Ռուսաստանում էլ ոչ ոք չի պատրաստվում կամուրջներն այրել և էմոցիոնալ հայտարարություններ անել»:

Օրացույց